ਬੇਰੁਜ਼ਗਾਰੀ (ਕਵਿਤਾ)

 

ਬੇਰੁਜ਼ਗਾਰੀ ਨਾਲ ਸਭ,

ਪ੍ਰੇਸ਼ਾਨ ਹੋ ਗਏ | 

ਗੱਭਰੂ ਵਿਦੇਸ਼ ਜਾਣ ਦੇ,

ਚਾਹਵਾਨ ਹੋ ਗਏ | 

ਚੁੱਕ-ਚੁੱਕ ਕਰਜ਼ਾ ਬੈਂਕਾਂ 'ਚੋਂ, 

ਬੱਚਿਆਂ ਦੀ ਖਾਤਿਰ,

ਜਾਣਦੇ ਹੁੰਦਿਆਂ ਵੀ ਮਾਪੇ

ਬੇਜਾਨ ਹੋ ਗਏ | 

ਕੌਡੀ ਮੁੱਲ ਨਾ ਪੈਂਦਾ, 

ਮਿਹਨਤ ਦਾ ਏਥੇ, 

ਡਾਗਾਂ ਖਾਂਦੇ, ਧਰਨੇ ਲਾਉਂਦੇ,

ਟੈਂਕੀਆਂ ਹੀ ਮਕਾਨ ਹੋ ਗਏ | 

ਘਰ-ਘਰ ਨੌਕਰੀ ਦੇਣ ਦੇ, 

ਵਾਅਦੇ ਕਰਕੇ,

ਸੱਤਾ ਦੇ ਭੁੱਖੇ ਸਭ,

ਨੇਤਾ ਮਕਾਰ ਹੋ ਗਏ | 

ਨਸ਼ਿਆਂ ਨੇ ਨੌਜਵਾਨੀ ਸਾਰੀ, 

ਖਾ ਲਈ ਪੰਜਾਬ ਦੀ, 

ਲੀਡਰਾਂ ਦੀਆਂ ਚਾਲਾਂ ਦੇ, 

ਗੱਭਰੂ ਸ਼ਿਕਾਰ ਹੋ ਗਏ | 

ਬੇਰੁਜ਼ਗਾਰੀ ਤੇ ਗਰੀਬੀ ਦੇ, 

''ਬਲਜਿੰਦਰ'' ਝੰਬੇ, 

ਸਾਡੇ ਰਿਸ਼ਤੇ ਵੀ ਸਾਰੇ, 

ਤਾਰ-ਤਾਰ ਹੋ ਗਏ | 

ਬਲਜਿੰਦਰ ਕੌਰ ਸ਼ੇਰਗਿੱਲ