ਅੱਗ

ਤਪਦੀ ਗਰਮੀ ਸੇਕ ਧੁੱਪ ਦਾ,

ਕੜਕ-ਕੜਕ ਕਰਦੀ ਕਣਕ ਖੇਤ ਵਿੱਚ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਆਇਆ ਸੁਨੇਹਾ ਘਰ ਤੋਂ,

ਖੇਤਾਂ ਨੂੰ ਭੱਜਦਾ ਜਾਵਾਂ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਕਿੰਝ ਬੁਝਾਵਾਂ, ਕਿੰਝ ਪਾਣੀ ਪਾਵਾਂ,

ਮਚੀ ਭੱਜੜ ਇੱਕਠੇ ਹੋ ਗਏ ਸਭ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਨਿਕਲੇ ਮੇਰੇ ਅੰਦਰੋਂ ਸੇਕ,

ਫੜ ਕਲੇਜਾ ਧਾਹਾਂ ਮਾਰਾਂ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਗਰਮੀ ਤੋਂ ਵੱਧ ਤਪਦਾ ਜਾਵਾਂ,

ਸ਼ਾਰਟ ਸਰਕਟ ਨੂੰ ਲਾਂਭੇ ਪਾਵਾਂ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਤੇਜ਼ ਹਵਾਵਾਂ ਚੱਲਦੀਆਂ ਪਈਆਂ, 

ਸਭ ਸੜ ਕੇ ਸਵਾਹ ਕਰ ਗਈਆਂ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਫਾਇਰ ਬ੍ਰਿਗੇਡ ਨੇ ਆ ਕੇ,

ਤੱਪਦਾ ਸੇਕ ਠਾਰ ਦਿੱਤਾ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਕਣਕ ਦੀ ਨਾੜ ਸੜ ਗਈ ਸਭ,

ਬਚਿਆ ਨਾ ਪੱਲੇ ਮੇਰੇ ਕੱਖ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਮਿਹਨਤ ’ਤੇ ‘ਬਲਜਿੰਦਰ’ ਪਾਣੀ ਫਿਰ ਗਿਆ,

ਮੁਆਵਜ਼ਾ ਮਿਲੇਗਾ ਪਤਾ ਨੀਂ ਕਦ,

ਹਾਏ! ਅੱਗ ਲੱਗੀ ਮੇਰੇ ਖੇਤ ਵਿੱਚ।

ਬਲਜਿੰਦਰ ਕੌਰ ਸ਼ੇਰਗਿੱਲ