ਭੰਬੀਰੀ (ਫਿਰਕੀ)

ਟੱਲੀਆਂ ਵਜਾਵੇ ਸਾਈਕਲਾਂ ਤੇ ਆਵੇ, 

ਭੰਬੀਰੀਆਂ ਦੀ ਆ ਕੇ ਦੁਕਾਨ ਸਜਾਵੇ,

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਪਿੰਡ ’ਚ ਵੜਦੇ ਹੀ ਹੋਕੇ ਲਾਵੇ, 

ਘੱਟ ਮੁੱਲ ’ਚ ਭੰਬੀਰੀਆਂ ਵੇਚੀ ਜਾਵੇ, 

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਭਾਵੇਂ ਇਹ ਖਿਡੌਣਾ ਕੁਝ ਮਿੰਟਾਂ ਦਾ ਪ੍ਰਾਹਣਾ,

ਵਜੂਦ ਜਿਸਦਾ ਕਾਗਜ਼ਾਂ ਤੇ ਕਾਨਿਆਂ ਦਾ ਹੋਣਾ,

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਲੱਗਦਾ ਸੀ ਜਿਵੇਂ ਚਾਬੀ ਨਾਲ ਜੋੜੇ, 

ਬੱਚਾ-ਬੱਚਾ ਖਰੀਦ ਭੰਬੀਰੀ ਲੈ ਦੋੜੇ,

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਬੱਚਿਆਂ ਦੇ ਚਿਹਰਿਆਂ ਦੀ ਬਣੀ ਮੁਸਕਾਨ, 

ਖਿਡਾਉਣਾ ਉਨ੍ਹਾਂ ਲਈ ਹੈ ਆਲੀਸ਼ਾਨ, 

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਫਿਰੇ ਉੱਡਦੀ ਹਵਾ ’ਚ ਗੇੜੀਆਂ ਲਗਾਵੇ,

‘‘ਬਲਜਿੰਦਰ’’ ਨੱਠਦੇ ਬੱਚਿਆਂ ’ਚ ਜੋਸ਼ ਭਰੀ ਜਾਵੇ,

ਦੇਖੋ-ਦੇਖੋ ਆਇਆ ਭੰਬੀਰੀ ਵਾਲਾ ਭਾਈ।

ਬਲਜਿੰਦਰ ਕੌਰ ਸ਼ੇਰਗਿੱਲ